馬蹄牛肉餅蒸飯

琴晚病魔急CALL, 結果今朝起唔到身返崇拜，唉！

唔想出街食味精， 於是諗住求求其其係百佳買D野煮個快飯。

但係．．．

百佳D菜真係買唔落手！都要＄＄買， 駛唔駛咁樣衰呀。

結果，都係要去街市行一轉。俾＄＄都俾得順氣D！

材料：

牛肉眼約 ＄50 （食新鮮牛真係越來越富貴）

馬蹄 4粒

果皮 半塊

葱白 1條

米 1杯半

做法：

果皮用熱水浸半小時，去瓤，切幼絲。

白米洗淨， 加入1：1的清水。放入蒸爐蒸15分鐘。

馬蹄去皮切粒， 牛肉眼切粒。

下調味料至牛肉粒 （生抽3茶匙、老抽1茶匙、糖半茶匙、生粉2茶匙、胡椒粉及麻油少許），拌勻。

加入果皮絲、馬蹄粒及葱白粒， 拌勻。順時針方向將所有材料拌勻至起膠。

將牛肉粒平鋪於飯面，放入蒸爐蒸10分鐘。

味道一流， 再加上椰菜花同西蘭花， 半個鐘有飯食。

我愛蒸爐！！

我要繼續怒蒸蒸蒸。