開心果軟心曲奇

阿囡好鐘意食Mrs. Field d曲奇餅，但實在太貴啦，十幾蚊塊！以前我會係佢臨關門大減價時買俾阿囡食，但依家好日都唔“出城”1次，好難買到較抵嘅曲奇。

買唔到啫，可以自己整嘛！

於是上網搵D食譜睇下，比較之下，終於調較到一個都幾合心水既食譜。

最重要係．．．．．平好多呀呀呀～～～

材料：（約可做18﹣22塊中型曲奇）
牛油 100g
黑糖 3/4杯
砂糖 1/4杯
雞蛋 1隻
雲呢拉精油 3/4茶匙
麵粉 1 1/4杯
Baking Soda 1/2茶匙
Baking Powder 1/2茶匙
鹽 1/2茶匙
開心果 適量

做法：
將開心果用麵粉棒弄碎。預熱焗爐至180度。

牛油室溫放軟。加入黑糖、砂糖、雞蛋及雲呢拉精油，拌勻。
（因為剛好蒸野，貪方便將D牛油放埋入去，結果耐得滯變左液態，但咁仲好，仲易整，錯有錯着！）

用另一個盤將麵粉過篩，加入baking soda、baking powder同鹽，拌勻。

將麵粉混合物分多次加入牛油蛋糊中，拌勻。

加入開心果碎粒，拌勻即成曲奇麵團。

焗盤鋪上可入焗爐的膠墊（或用焗爐紙），弄濕雙手，用匙羹取出適量麵團，用手將它弄成小球體，放在焗鋪上。

記住記住記住：各小球之間要預留多D空間，約2﹣3 cm，因為係焗嘅過程佢會向四周溶開。我第1次整時就係低估咗呢點，結果變成1大塊！）

入焗爐180度焗約10分鐘，取出放上鐵架待涼，入落密實盒即成。

其實可以做不同味道，我上次整咗朱古力味，今次因為新年食淨好多開心果，所以先做開心果曲奇。（特別嗚謝2位盧小姐幫我去殼，雖然係過程中偷食咗唔少，嘿嘿！）

呢個食譜成功率都幾高，大家可以試一試。

蜜糖青檸香草雞翼

雞翼，又肥又好味，每隔一排又想會食嘅肥霸食品。

見到鬼嫁食譜整烤雞好似好得，等我轉一轉，試下用嚟整雞翼得唔得先。

又幾得喎！

係之後要抹焗爐辛苦D咁囉 （辛苦晒呀，盧生！）

材料：

雞翼 1磅（約10﹣12隻）

乾迷迭香 1茶匙

乾百里香 1茶匙

牛油 約20g（室油放軟，約20﹣30分鐘，視乎天氣溫度）

青檸 1個（渣汁）

蜜糖 2湯匙

鹽 1.5茶匙

做法：

雞翼洗淨解凍。

加入乾迷迭香 、乾百里香 、牛油、青檸及鹽，拌勻醃1個小時或過夜。

焗爐預熱230度。將雞翼放在烤架上。在烤架下鋪上錫紙，方便清洗（因為係焗嘅過程有好多汁滴到烤架下方。）

將雞翼放入焗爐焗10分鐘，取出反轉雞翼，再用230度焗8分鐘。最後用GRILL MODE 或250度焗2分鐘至金黃即可。

最後轉MODE或將溫度提高至250度時要小心睇火，一唔覺意就會變咗黑雞翼啦， 嘿嘿！

簡單到無朋友，又一味快靚正餸菜。

雞翼萬歲！！

墨西哥玉米片配牛油果醬

前一排牛油果特價，10蚊2個，見仲青BB，有排放，於是買咗先，再慢慢諗點整。

再過一排，見到樓下個間百X竟然有原味墨西哥玉米片買，仲要特價添，好！入貨！

諗起上次係街食嗰個墨西哥玉米片配牛油果醬．．．唉！

我要好味過佢！

今日終於等到牛油果由青變黑，又有少少時間，一於整好佢。

剛好前一排鬼嫁出咗個食譜，啱晒！

材料：

牛油果 1個

紫洋蔥 4分1個

鹽 半茶匙

青檸汁 半個

做法：

紫洋蔥切細粒，待用。

將牛油果肉取出，用匙背壓成蓉。

加入紫洋蔥粒、鹽及青檸汁，伴以墨西哥玉米片進食即可。

時間緊迫，無係做嘅過程影相，但咁咁咁咁簡單，無相都識做啦，RIGHT？

又因為買唔到芫茜，所以無加，下次試下加埋睇下係咪好味D先。

阿囡唔鐘意食生洋蔥，所以做咗一兜走洋蔥，但鹽份味可略減。

整完放低俾家姐同爸爸食，然後我去同妹𡜻沖涼，出嚟時．．．

無啦，無晒D醬！！

我又要等牛油果特價啦～～～

法式蘑菇鹹批

煎牛扒做晚餐，配沙律菜薯角，又驚唔夠食，諗起最近睇過呢個食譜，再參考下CANDICE個食譜，咁啱又有盒蘑菇係到喎，好！又試下先。

材料：

批皮（6吋派模）：蛋黄 1個
                                  低筋麵粉 100g
                                  牛油 50g
                                  冰水 20ml
                                  鹽 少許

餡料： 蘑菇1盒
             淡忌廉 70ml
             洋蔥 半個
             蒜頭 2粒
             雞蛋 2隻
             芝士 2片
             鹽 少許
             荳蔻粉 少許
             黑糊椒 少許

做法：

先做批皮。

低筋麵粉過篩。牛油切小粒（不用室溫回軟）。
將低筋麵粉和鹽拌勻，加入牛油，用手將所有材料搓勻。

         

















倒入蛋黄及冰水，用手再將所有材料搓勻。

用保鮮膜將麵團包好，放入冰格雪半小時。

預備餡料。
蘑菇切片，洋蔥和蒜頭切粒。

燒熱油鑊，加入蘑菇炒至出水，加入洋蔥及蒜頭炒香。盛起放涼備用。

取出麵團，放室溫回軟約10分鐘。將麵團推開成直徑約25 cm的圓形。
批模掃上橄欖油，慢慢放上圓形麵團，鋪平，將多餘的麵團切去。
用义於批底刺上許多少孔。

以200度焗15分鐘至金黄，取出批底，放涼備用。

係焗緊批底時，繼續準備餡料。
在大碗中加入2隻雞蛋，倒入淡忌廉，拌勻。
加入鹽、荳蔻粉及黑糊椒，拌勻待用。

於放涼了的批底鋪上撕碎嘅芝士，放入放蘑菇洋蔥餡料，倒入蛋奶漿，拌勻。

放入焗爐180度焗約20分鐘至金黄即成。


凍冰冰，出焗熱辣辣，好快又掃清。

雖然好多步驟，但其實都好快手攪掂，淨食做午餐都得。餡料可以有好多變化，下次等我試下煙肉西蘭花先。

同場加映焗薯角，同個批一齊焗，一爐2味，最啱我呢D懶人。

鐵鑄鍋法國麵包

呢幾日真係太太太太凍， 凍到人都唔想旭。

痴線㗎！2月都仲得7、8度，仲凍過索契，呀～～～

經過多次失敗之後， 終於大成功！

有蒸爐幫手，發酵時間大大縮短（好彩咋，呢幾日咁凍，如果室溫發酵真係等到人都顛！）

真係快手好多！

（參考台灣LC FACEBOOK)
材料：
高筋麵粉 2杯
全麥麵粉 1杯
溫水 約1﹣1.5杯
速效酵母 1.5茶匙
鹽 1.5茶匙

做法：
將所有麵粉過篩，加入酵母及鹽。

先倒入1杯溫水，用電動攪拌器將所有材料拌均，慢慢將餘下嘅水加入，將麵團攪到光滑有彈性，約5分鐘。
（我就係衰係呢個步驟，之前一次過倒入所有水， 結果埋唔到團，成pat爛糊仔咁。今次結果用咗差少少先夠1杯半水先成功）

蓋上保鮮膜，放入蒸爐，40度發酵20分鐘至麵團發大一倍，按下不回彈則完成。

取出麵團，略為滾圓，蓋上保鮮膜讓麵團放鬆10分金鐘。

將麵團放在枱上，用手將它滾動成緊密的球體。塗少許橄欖油在鐵鑄鍋，將麵團放入鐵鑄鍋，蓋上煲蓋，放入蒸爐40度發酵15分鐘。焗爐預熱至230度。

塗少許橄欖油於麵團上，用刀畫上“十”字。蓋上煲蓋，入焗爐焗30分鐘。

打開蓋，焗爐溫度降到180度， 再焗15分鐘至表面即成。

超脆皮，正。

肉餅盅頭飯

和囡囡的兩個人午餐，有飯有肉有菜， 都係半個鐘搞掂。

材料
梅頭豬肉 約＄20 攪碎
飯 2碗（今次用隔夜飯，連煮都慳返）

做法（參考鬼嫁鹹魚肉餅煲仔飯食譜）
將醃料（鹽麴3茶匙、糖半茶匙、生粉半茶匙、酒1茶匙、麥皮1湯匙）加入豬肉。

用匙𡙡順時針方向拌勻十數下， 再將肉碎放入食物袋內，向枱面撻約3分鐘。
（鬼嫁教嘅方法，可以令肉餅結實D，又真係好WORK喎，但一定要最少入2層，因為好易穿）

將隔夜飯放入燉盅，再將肉餅整成圓餅型，放在飯面。

放入蒸爐內蒸20分鐘，取出，倒入豉油即可。

麥皮的原理是令肉餅鬆化，我試過幾次， 又真係落左唔會死實。鹽麴一樣可以令肉餅鬆化，我今次用呢隻，基本上醃任何肉類都可以。

今次用LC燉盅，即刻覺得碗飯都高貴咗，開始明白點解D人會咁LIKE佢。

LC遇上MIELE，主婦界的完美結合。

當蒸到最後4分鐘，放入椰菜同煲仔飯豉油，一齊出爐有得食，方便快捷。

日式番茄牛肉

突然要煮飯， 但個雪櫃只係得D餸頭餸尾， 好彩依家有好多現成調味料， 呢隻就係其中一種， 可以係無番茄之下都可以煮到好番茄味嘅餸。

豬豬島同蘇告都有得買，平靚正，緊係要有佢看下門口。

材料：
牛柳片 約＄25
洋蔥 半個
紅蘿蔔 1條
番茄磚 2舊


做法：

牛柳片用1茶匙生抽、半茶匙糖、1茶匙生粉及少許橄欖油醃15分鐘。

將洋蔥及紅蘿蔔切片。

落橄欖油，開火燒至油出煙，落牛柳片炒至7成熟，盛起。

轉中火， 原鑊落洋蔥炒至金黃 （約3分鐘），加入紅蘿蔔略炒。

加水至剛蓋過所有材料， 煲滾轉小火煮約8分鐘。

落牛柳片及番茄磚，再煮至滾即成。

汁濃，好番茄，送飯一流，小朋友至愛。

加埋麵豉蒸茄子同蒸椰菜，健康方便又快捷

 






都係個句：我愛蒸爐，我要怒蒸蒸蒸！