最近愛上芥末粒的口感，係CANDICE KITCHEN見到呢個食譜，想試好耐，但要阿囡們又刀又义食黑豚扒．．．．殺了我吧！
唔食黑豚扒，嚟個煎豬扒，都得啫！
蕃茄豬扒、洋䓤豬扒、薯仔豬扒就食得多，蜜糖芥末豬扒，你食過未？
西式醬汁，中式煮法，算唔算FUSION菜呢？
材料：
梅頭豬扒 3塊
黑胡椒 少許
鹽 少許
法式芥末醬 2湯匙
法式芥末子醬 2湯匙
淡忌廉 2湯匙
蜜糖 2湯匙
做法：
豬扒洗淨，吸乾水，用肉鬆鎚拍鬆豬扒。
用少許黑胡椒及鹽塗抹豬扒2邊，醃15分鐘。
燒紅鑊，煎香豬扒2邊至金黃，約每邊煎4﹣5分鐘。
取出豬扒，吸一吸油。將豬扒切成條狀。
準備醬汁。將法式芥末醬、法式芥末子醬、淡忌廉及蜜糖拌勻。試味，若不夠甜可再加少許蜜糖。
將豬扒回鑊，快手加入醬汁拌勻即可。
估唔到係咁酸酸甜甜咁開胃，小朋友食得開心，我又煮得開心。
不過下次有機會，都真係要試下黑豚扒～～
