馬蹄牛肉餅蒸飯

琴晚病魔急CALL, 結果今朝起唔到身返崇拜，唉！

唔想出街食味精， 於是諗住求求其其係百佳買D野煮個快飯。

但係．．．

百佳D菜真係買唔落手！都要＄＄買， 駛唔駛咁樣衰呀。

結果，都係要去街市行一轉。俾＄＄都俾得順氣D！

材料：

牛肉眼約 ＄50 （食新鮮牛真係越來越富貴）

馬蹄 4粒

果皮 半塊

葱白 1條

米 1杯半

做法：

果皮用熱水浸半小時，去瓤，切幼絲。

白米洗淨， 加入1：1的清水。放入蒸爐蒸15分鐘。

馬蹄去皮切粒， 牛肉眼切粒。

下調味料至牛肉粒 （生抽3茶匙、老抽1茶匙、糖半茶匙、生粉2茶匙、胡椒粉及麻油少許），拌勻。

加入果皮絲、馬蹄粒及葱白粒， 拌勻。順時針方向將所有材料拌勻至起膠。

將牛肉粒平鋪於飯面，放入蒸爐蒸10分鐘。

味道一流， 再加上椰菜花同西蘭花， 半個鐘有飯食。

我愛蒸爐！！

我要繼續怒蒸蒸蒸。

腐乳蒸雞翼

蓁蓁成日話要試下食腐乳， 佢話唔怕辣喎 （超級懷疑～～）

再加上新寵蒸爐入屋，呢輪我要怒蒸蒸蒸！！！

（食譜參考 簡易食譜）

材料：
雞翼 1磅 （約10隻）
腐乳 3磚
薑絲 少許

生抽 1茶匙 （或以鹽麴1茶匙代替）
老抽 4分1茶匙
糖 1茶匙
米酒 1茶匙
胡椒粉、麻油 各少許

做法：
將雞翼解凍。洗淨抹乾。

加入以上醃料拌勻，醃約15﹣30分鐘。

將腐乳壓碎， 拌入雞翼中， 加薑絲。

放入蒸爐蒸20分鐘至熟透 （或隔水蒸亦可）。

實在太好食， 一放上枱已經無咗幾隻， 但真係簡單又好味， 零難度。

燉肉汁

老公最近經常出差， 無啖好食， 聽聞燉肉汁平靚正， 最近新歡入屋， 當然要試試！

材料：
豬展或瘦肉 約＄30
（我幫襯百佳農夫豬肉，唔錯！）

做法：
將豬展切幼條。

取一大湯碗， 內放入一倒轉小碗， 將肉條圍住小碗，蓋上錫紙， 放入MIELE蒸爐燉兩個半小時。

取出大碗， 將肉夾走， 取走小碗， 即餘下約大半碗肉汁。

老公話一飲完， 一鼓熱氣湧上腦， 好似好補咁 （我話係咪碗湯熱得滯咋）

啤酒番茄一口牛

今日有朋至遠（？）方來， 一於整返個可以淨食又可以送意粉嘅餸先。

又係梁九記一口牛出場嘅時候啦， 正！ 比牛肋條瘦， 又嗒嗒肉！

材料：
安格斯一口牛1包 （約1磅多）
紅蘿蔔 2條
番茄 5個
洋蔥 1個
啤酒 1罐
香葉 2片
麵粉 適量

做法：
一口牛用少許鹽及黑胡椒15分鐘。拍上適量麵粉，待用。
番茄及洋蔥切粒，紅蘿蔔切厚片。

先將一口牛放入鑊中煎至金黄色，盛起。

爆香洋蔥，放入甘筍用中火煮5分鐘。

加入一口牛、啤酒、蕃茄及香葉。加蓋滾起轉小火煮約30分鐘。加入鹽調味即成。

味道特別，有陣陣啤酒味，送飯或意粉一流。但以上份量較多，夠吃2餐。

番茄炆牛肋條

去梁九記朝聖後，冰箱滿滿，要加快消耗速度，以便下次入貨。睇到Gigi姐用香茅魚露炆牛筋腩，幾特別，以前多數用柱候醬嘛！未試過，等我用新入貨嘅牛肋條代替牛筋腩試下先。

食材

牛肋條1斤（約1.35磅）

番茄6個
紅蘿蔔2個
洋蔥半個
香葉2片
香茅2枝
八角2粒

調味料

茄汁1杯
茄膏2湯匙
冰糖1小粒,
魚露適量

步驟

牛肋條解凍，放入滾水，加薑丶蔥出水，倒出用清水沖淨。

紅蘿蔔切滾刀，番茄及洋蔥切粒，已出水牛肋條切件，香茅切段拍碎。

燒熱油，放下紅蘿蔔略炒，取出待用。原煲加入洋蔥、番茄炒一會，加入牛肋條、紅蘿蔔拌勻。加入香葉、香茅、八角、冰糖、茄汁及茄膏拌勻。加水至剛覆蓋所有食材。

滾起轉小火炆15分鐘，熄火焗15分鐘。重覆比步驟3至4次至牛肋條夠淋。

上枱前，倒入魚露調味即成。

免揉麥包

想食自家包，但麵包機又壞咗，又唔想揉包揉到手軟，決定試下聞名已久嘅免揉包。

健康D，先嚟個麥包先。（參考網頁 簡易食譜）

食材

高筋麵粉 170g
全麥麵粉 180g
奶粉 2湯匙
速發酵母 1.5茶匙
鹽 1茶匙
暖水 310ml

步驟

先將高筋麵粉、全麥麵粉過篩，加入奶粉、速發酵母及鹽均勻。

倒入暖水均勻。

蓋上蓋，室溫發酵1小時，然後放入雪櫃雪過夜。

   

取出麵團，放在枱上。灑少許高筋麵粉於枱及麵團上。手沾粉，將麵團對摺2次，略為整至長形，收口向下。

保鮮紙掃上油，蓋著麵團發酵1小時。

 




焗爐預熱至220度，將1杯熱水倒在底盤中。麵團放中層焗25分鐘即成。

 




因為無睇火，所以燶咗少少，但個皮超脆，內裏鬆軟，好得！

 

第二朝焗返脆，塗上果醬，一樣好食，yummy!

永不失敗的Cranberry Muffin

記返低個食譜，基本上所有味道的Muffin亦以此為基礎 （參考 獨角仙＠藍色大門）

材料 （約6個muffin）

牛油 100g
糖 50 g
蜜糖 60 g
糖漿 30 g
雞蛋 2 隻
低筋麵粉 100 g
高筋麵粉130 g
泡打粉 5 g
泡打梳打 2 g
鹽  2 g
乳酪 100 g
Whipping Cream 100 g
Cranberry 1小包

步驟

牛油放室溫變軟身，約20分鐘。

將糖加入牛油打至鬆身，加入糖漿及蜜糖再打至均勻。

將雞蛋丶乳酪及wrapping cream加入牛油混合物，再下低筋麵粉丶高筋麵粉丶泡打粉丶泡打梳打，輕力拌勻即可（非常重要，否則出品會好硬）

最後加入Cranberry拌勻。

倒入紙模，180度焗約20分鐘至金黃即成。

三色蛋 （參考Gigi姐 吾淑吾食）

樣子吸引，又有鹹蛋，蓁蓁實鍾意。

今個星期煮完先補返張相。

食材

雞蛋丶鹹蛋丶皮蛋各3隻
水3湯匙

步驟

雞蛋打勻，鹹蛋皮蛋切碎。

將鹹蛋皮蛋加入雞蛋液拌勻，倒入已掃油深碟，蒸約十分鐘至凝固。

倒出三色蛋，切件上碟。

唔知係咪掃唔夠油，有D痴底，所以唔能夠完整倒出嚟。下次再試過！